Kan Kohhran LOGO design tu chu Bryan Gray a ni a, Design School, Pasadena, California-a Graduate a ni.

Adventist Logo leh a awmzia:

Kan kohhran Logo atana kan thlan hian kan thupui leh kan kohhran thil tum a tarlang chiang hle a. A innghahna hi, Pathian thu Bible inkeu sa a ni a, hei hian a chhunga thu awm chu chhiar a nunpui tur a ni tih a lantir. Bible thuchan ken ber chu Kross thu a ni angin,  Logo lai takah hian Kross a awm a, Kross leh Bible inkeu chungah, thutak puangchhuaktu Thlarau Thianghlim entirtu meialh lem a awm a.

He milem hi mawl te mawlin (Simple) Adventist thurin zawng zawng puangchhuak zo lo mah se Khawvel pum huapa kan thurin tarlanna milem a nih ngei beisei a ni.

A CHHIP ZUM

A chhipa van lam kawk vaha zum chho hian van lam pana hmasawn zel kan nihzia leh Krista lo kal leh huna mitthite kaihtawha Vanlam pana kan kal hun tur Adventistte nghahfak chu a entir a.

MEIALH

Meialh pathum hian khawvel pumpui a vel a, (Khawvel hi tarlan a ni ziah kher lem lo) heng meialh pathumte hian Thupuan bung 14-a Vantirhkoh pathumte kha an entir a. Kan thuchah ken hi Khawvel pum puiah puang tur kan ni tih a entir bawk.

Meialh hian Thlarau Thianghlim a entir a, Thlarau Thianghlim puihna avang chauhin Pathian thu puanchhuah theihna leh hriatthiamna theihna kan nei thei a ni.

BIBLE

Bible inkeu hi Pathian thu entirtu a ni a, Bible hi awm ta lo se Krista zarah Mihringte tana tlanna ruahmanna hi kan hre hauh lo vang.

Thildang zawng zawng innghahna chu Bible a ni tih kan hmu a, hei hian kan thurin innghahna chu Bible a ni tih a entir. Chu bakah Bible hi a inkeu pharh saa dah a ni a, hei hian Bible chhung thu awm zawng zawng hi kan pawm vek a ni tih a entir bawk.

KROSS

Kross hian Chhandamna Chanchin tha a entir a, Krista inhlanna hi kan ngaihlu a, Kan kan rinchhan leh kan innghahna ber a ni tih lantir nan a laiah dah a ni.

Kan Kohhran hming chungchang:  Seventh-day Adventist kan tih hian Kohhran sawina te, Kohhran chhunga pawl awm te, leh zirna in leh kohhran dept. hrang hrang awmte a kawk thei a, chu bakah Kohhran member sawina a ni thei bawk. Seventh-day Adventist nunphung anga nung lo leh, Adventist hotute hriatpui lem lohva Seventh-day Adventist ka ni lo tih ve vak vak hi, a dik lem lo. Pawl hming hi inregistered thlapa invuah kan nih avangin. Chutiang a lo inti Adventist ve ngawt chu vai, mizotawng thiam mang lovin, “Keimah Mizo tlangval,” tia lo au ve chiam chiam ang lek a ni.

          Lam dan te, ziah dante hi, Adventist te chuan kan thiam ngei ngei tur a ni a, mahni pawl hming lam dan leh ziah dan hre lo nih chu a zahthlak a ni.

Spelling: Seventh-day Adventist, Seventh tih leh day inkarah hian hyphen tawitea thai phei a awm ngei ngei tur a ni a, day tih pawh hi hawrawp te a ni tur a ni.

          Lam dan: Seventh-day ad’-ven-tist tiin kan lam tur a ni a, ad-ven’-tist tia kan lam hi lamdan dik a ni ber lo.

Lamtawi: Kohhran hming lam tawi, atan ‘Adventist’ tih hi kan hmang tur a ni.

          Eng kohhran nge I nih? Min tih chuan ‘Seventh-day” ti a chhang lovin, “Adventist” tiin kan chhang thin tur a ni.

Ngaihtuah zui atan:

          Ni sarih tlang tih ai chuan Adventist tlang tih zawk tur a ni ang em?

          Seventh-day zawk hi kan ngai pawimawh hle a nih pawhin, nisarihna tlang tih zawk tal tur a nih hmel.